【上海话朗读】我是快乐的搬运工

我是快乐的搬运工

来源：新民晚报

作者：金洪远

沪语改写：高仁

文字修正：丁迪蒙

诵读：潘慧芳

点击下方收听音频，时长7分。

上个号头我搭几个文友聚会个辰光，有个一直注意我“动向”个文友有意来揭揭我个‘老底’，伊讲：我发现侬近枪把好像对搬运工个角色情有独钟嘛！“搬运工”？我有眼丈二和尚摸勿着头脑了，我勿是某品牌纯净水公司个代言人啊，啥个“我们勿生产水，我们只是大自然个搬运工”！但是伊讲得像真个一样个，其余文友也随声附和、帮伊个腔，看来，群众个眼睛是雪亮个，一眼也勿错，我确实是勒热衷于拿文友刊发勒报刊浪个美文搬运到微信圈里共享，讲我是搬运工，我真是不胜荣幸之至啊。

其实，伊拉讲迭一枪，好像并勿全面。当初，我勒海滨小城工作、生活个辰光，就热衷于做“搬运”迭个角色了，而且还是邪气投入个。朋友搭同事假使有得文章发表，无论是勒聚会还是勒闲聊，我侪会一如既往、自作多情个推介，有文友曾经调侃我：“像煞比自家个文章刊登出来还要开心。”但是，在座个文友一本正经讲，侬讲得一眼也勿错，每逢阿拉个习作勒沪上个报刊浪向刊登出来，金先生勿是电话通风报信、就是登门送样报祝贺，伊是拿一个欢乐分享变成功两个欢乐个共享者呀！

为朋友喝彩，勿仅仅是我个习惯、而且我是乐此不疲。除脱我熟悉个文友个习作之外，也有我器重个作家写个文章个转发，有辰光，还兴之所至勒微信群里发表我肤浅个点评，虽然有点勿自量力，竟然也得到圈里向同好者个鼓励搭点赞，微信公众平台还会时勿时发来“恭喜你的留言入选为精选留言”。人有自知之明，我缺少知识搭学问，但是我勿敷衍，态度还算是认真个，就像知根知底老朋友所讲个：总比伊些跷好仔大节头捧牢鲜花个“强”好得多唻！

沪上美食家个文章、譬如西坡搭仔沈嘉禄先生个文章我邪气欣赏，读搿些字里行间里透勒闲静搭仔文雅，又常庄溢出茶香搭仔肴馔之香、有知识、有学问个美文， 经常会让我情勿自禁拨作者一路带到伊个回味无穷个境界里去。我多年个老同事辛毅搭紫苑女士，绝对是上得了厅堂、下得了厨房个美食操作者，除脱可以烹制一顿美餐搭美点，两家头对我转发个美食作家个文章常常进行言简意赅个点评：精品！其实，伊拉对前一枪报纸浪刊发个，介绍“老干妈”辣酱个文章个读后感也称赞讲是“精品”，比方“猪油菜饭里拌一眼‘老干妈’，更加吊鲜头”。搿能个活色生香、又邪气别致个文字，假使呒没长期对美食佳肴个追求搭向往，笔下头是老难呈现出像品尝好酒一样个充满浓浓个烟火气个文字个。读伊拉两家头个点评，时勿时会得情勿自禁让我回忆起勒故乡绍兴咸亨酒店个食客，伊拉品酒辰光个伊种悠然自得个样子……

其实，勒我结识个朋友或者邻居当中，像搿能介欢喜做搬运工角色个并勿少见。比方自华搭仔希平兄，总归以勒第一时间微信群里转发文友刊发个习作为荣。芳邻晓梅，只要我个习作勒本市报刊一露面，伊总归是第一个通风报信、第一个送报刊上门个。我心里向勿免勒猜想，难道迭格是伊每日天早浪长跑十公里练出来个本事？搿位热心人，是我家主婆个闺蜜，还常庄是我个新闻发言人：侬晓得伐，昨日子金先生个文章又登报唻！搿种欣喜若狂个神情，好像登报个是伊而勿是我。欢喜寻开心个我勒小区里偶尔碰到伊，总归要搭伊打朋、叮嘱伊一番：侬发声音是否可以轻一眼啊，弄得全世界侪听到了呀。

知根知底个朋友讲：我发现侬每日天总归是老开心个，有啥秘诀可以传授个呢？其实，开心个道理是邪气简单个：为朋友喝彩，做个快乐个搬运工，葛末，侬个心情就一定是阳光灿烂个！

心情好，一切就侪好了呀。

（本文作者）

（本文朗读者）

来源：“吳越小豬”公众号

上海老底子

每天为侬送上精彩文章一组

打开尘封的记忆，寻觅往昔的岁月

叙上海老底子事

忆上海老底子人

诉上海老底子情

以史明志，以启未来

原标题：《【上海话朗读】我是快乐的搬运工》